آر آئی یو جےکا 12ستمبر کو آزادی صحافت مارچ کا اعلان

اسلام آباد ۔ راولپنڈی اسلام آباد یونین آف جرنلسٹس کے صدر عامر سجاد سید نے قلب نیوز ڈاٹ کام کو بتایا کہ راولپنڈی اسلام آباد یونین آف جرنلسٹس کے ہنگامی اجلاس میں آزادی صحافت مارچ کی حتمی تاریخ کا اعلان کردیا ہے ۔

12 ستمبر 2021 کو نیشنل پریس کلب اسلام آباد سے آزادی صحافت مارچ کیا جائے گا جو پارلیمنٹ کے باہر پہنچ کر24 گھنٹے کے احتجاجی دھرنے میں تبدیل ہو جائے گا جہاں پر رات بھر ملک کے معروف اینکرز اپنے پروگرام کریں گے۔

انہوں نے بتایا کہ اجلاس میں پریس فریڈم ایکشن کمیٹی کے چیئرمین افضل بٹ،سیکرٹری آر آئی یو جے طارق علی ورک،ممبر ایف ای سی شفیق راجہ، صدر نیشنل پریس کلب شکیل انجم،سیکرٹری انور رضا،سابق صدر آر آئی یو جے علی رضا علوی،اصغر چوہدری، ایگزیکٹو ممبر اظہار خان نیازی،روبینہ شاہین،فرحت عباسی،افشاں قریشی ،سنیئر صحافی آصف بشیر چوہدری،نیئرعلی ،رانا زاہد،رانا کوثر،جعفر بلتی کے علاوہ صحافیوں کی کثیر تعداد نے شرکت کی۔

انہوں نے مزید بتایا کہ اجلاس میں صحافیوں کی جبری برطرف،تنخواہوں واجبات کی عدم ادائیگی،تنخواہوں میں کٹوتیوں،صحافیوں پر ہونے والے تشدد اور اغواءکے واقعات،صحافیوں کو آف ائیر کرنے اور پروگراموں کی بندش اور پاکستان میڈیا ڈویلپمنٹ اتھارٹی کے کالے قانون کے حوالے سے تفصیلی گفتگو کی گئی۔

عامر سجاد سید کا مزید کہنا تھا کہ فیصلہ کیا گیا کہ پارلیمنٹ کے مشترکہ اجلاس کے دوران پارلیمنٹ کے باہر احتجاجی دھرنا دیا جائے،آر آئی یو جے آزادی صحافت مارچ 12 ستمبر کو شام چار بجے نیشنل پریس کلب اسلام آباد سے شروع کیاجائےگا جو پارلیمنٹ کے باہر پہنچ کر 24 گھنٹے کے دھرنے میں تبدیل ہو جائے گا۔

آزادی صحافت مارچ میں سیاسی ،مذہبی،وکلا،طلباءاور تاجر تنظیمیں بھی شرکت کریں گی اور احتجاجی دھرنے میں رات بھر ملک کے نامور اینکرز جن میں حامدمیر،طلعت حسین ،نصرت جاوید،مطیع اللہ جان،امبرشمسی رات بھر اپنے پروگرام کریں گے اور 13 ستمبر کو صدر پاکستان عارف علوی کے پارلیمنٹ کےمشترکہ اجلاس سے خطاب کے دوران بھی احتجاجی دھرنا جاری رہے گااور یہ علامتی احتجاجی دھرنا صدر مملکت کے پارلیمنٹ سے خطاب کے بعد ختم ہو جائے گا ۔

٭۔۔۔۔۔۔۔۔۔۔۔۔
نوٹ: قلب نیوز ڈاٹ کام ۔۔۔۔۔ کا کسی بھی خبر اورآراء سے متفق ہونا ضروری نہیں. اگر آپ بھی قلب نیوز ڈاٹ کام پر اپنا کالم، بلاگ، مضمون یا کوئی خبر شائع کر نا چاہتے ہیں تو ہمارے آفیشیل ای میل qualbnews@gmail.com پر براہ راست ای میل کر سکتے ہیں۔ انتظامیہ قلب نیوز ڈاٹ کام