ترقیاتی منصوبوں سے معاشی انقلاب آئے گا،وزیراعلیٰ گلگت بلتستان

گلگت . وزیر اعلیٰ گلگت بلتستان خالد خورشید کی زیر صدارت پبلک سیکٹر ڈویلپمنٹ پروگرام کے تحت گلگت بلتستان میں جاری ترقیاتی سکیموں پر پیش رفت کے حوالے سے دوسرا جائزہ اجلاس۔اس اجلاس کی سربراہی کرتے ہوئے متعلقہ محکموں و اداروں کو ہدایات جاری کی کہ ان سکیموں پر جاری کام کو بہتر کریں اور اس سلسلے میں درپیش رکاوٹوں اور مسائل کو فوری طور پر حل کرکے ان سکیموں کی بروقت تکمیل کو یقینی بنائیں۔

وزیر اعلیٰ گلگت بلتستان خالد خورشید نے ان سکیموں سے متعلق ٹائم لائنز کو فالو کرنے کی تلقین کی۔ اجلاس میں مختلف سکیموں کے پروجیکٹ ڈائریکٹرز نے اجلاس کے شرکاءکو ترقیاتی کاموں پر بریفنگ دی۔ اجلاس میں صوبائی وزیر خزانہ، صوبائی مشیر قانون، چیف سیکریٹری گلگت بلتستان، وفاقی سیکریٹری امور کشمیرو گلگت بلتستان، سیکریٹری پلاننگ کمیشن، ایڈیشنل چیف سیکریٹری گلگت بلتستان اور متعلقہ محکموں کے سیکریٹریز نے شرکت کی۔

اجلاس میں پی ایس ڈی پی کے تحت جاری منصوبوں کا جائزہ لیا گیا تاکہ ان منصوبوں کی بروقت تکمیل کو یقینی بنایا جاسکے۔ اس موقع پر گفتگو کرتے ہوئے وزیراعلی گلگت بلتستان خالد خورشید نے کہا کہ گلگت بلتستا ن ڈویلپمنٹ پیکیج کے تحت ترقیاتی منصوبوں کی تکمیل سے صوبے میں معاشی انقلاب آئے گا اور سیاحت کو بین ا لاقوامی سطح پر فروغ ملے گا۔

پی ایس ڈی پی منصوبوں کے پروجیکٹ ڈائریکٹرزکی ملازمت کو ان کی کارکردگی سے مشروط کی جائے۔ وزیر اعظم پاکستان عمران خان گلگت بلتستان کی تعمیر و ترقی میں خصوصی دلچسپی لے رہے ہیں۔ اسی سلسلے میں وزیر اعظم پاکستان نے گلگت بلتستان ڈویلپمنٹ پیکیج پر عملدرآمد کے حوالے سے کئی اجلاس کی صدارت کی ہے۔

اجلاس میں 20میگاواٹ ہنزل پاور پروجیکٹ، 26میگاواٹ شغرتھنگ پاور پروجیکٹ، 16 میگاواٹ نلتر پاور پروجیکٹ، 4میگاواٹ تھک چلاس پاور پروجیکٹ، 250بیڈ ہسپتال سکردو، 50بیڈ امراض قلب ہسپتال گلگت، پولی ٹیکنیک انسٹیٹیوٹ سکردو، ریجنل گریڈ فیز I، سیوریج اینڈ سینٹری سسٹم گلگت، گلگت نلتر ایکسپریس وے، 34.5میگاواٹ ہرپور پاور پروجیکٹ، 30 میگاواٹ غواڑی پاور پروجیکٹ، گوریکوٹ تا شغرتھنگ روڈ کی تعمیر و میٹلنگ، شاہراہ نگر کی تعمیر، گلگت شندور ایکسپریس وے کی تعمیر، 54میگاواٹ عطاء آباد پاور پروجیکٹ، داریل تانگیر ایکسپریس وے کی تعمیر، گلگت میں میڈیکل اور نرسنگ کالج کا منصوبہ، تھلیچی تا شونٹر روڈ منصوبہ سمیت دیگر اہم منصوبوں کی معیار اور رفتار کا تفصیلی جائزہ لیا گیا۔

اجلاس میں فیصلہ کیا گیا کہ این ایچ اے اور واپڈا کے تحت جاری منصوبوں کی رفتار کو بہتر بنانے کیلئے متعلقہ اداروں سے وفاقی سطح پر رابطہ کیا جائے گا۔

٭۔۔۔۔۔۔۔۔۔۔۔۔
نوٹ: قلب نیوز ڈاٹ کام ۔۔۔۔۔ کا کسی بھی خبر اورآراء سے متفق ہونا ضروری نہیں. اگر آپ بھی قلب نیوز ڈاٹ کام پر اپنا کالم، بلاگ، مضمون یا کوئی خبر شائع کر نا چاہتے ہیں تو ہمارے آفیشیل ای میل qualbnews@gmail.com پر براہ راست ای میل کر سکتے ہیں۔ انتظامیہ قلب نیوز ڈاٹ کام