معروف صحافی تجزیہ کار رحیم اللہ یوسفزئی انتقال کرگئے

پشاور .معروف صحافی تجزیہ کار رحیم اللہ یوسفزئی انتقال کرگئے ،رحیم اللہ یوسفزئی کے اہلخانہ کے مطابق مرحوم طویل عرصے سے علیل تھے، ان کی نمازجنازہ کل دن 11 بجے مردان کاٹلنگ انذرگئی نزد سوات ایکسپریس وے کاٹلنگ انٹرچینج کے قریب خان ضمیر بانڈہ میں ادا کی جائے گی۔

رحیم اللہ یوسفزئی 10 ستمبر 1954 کو پیدا ہوئے، انہیں القاعدہ کے سربراہ اسامہ بن لادن کے انٹرویو کی وجہ سے کافی شہرت ملی۔رحیم اللہ یوسفزئی ان چند صحافیوں میں سے ہیں جنہوں نے طالبان کے کارروائیوں کو رپورٹ کیا اور 1995 میں خود قندھار گئے۔

وہ روزنامہ جنگ کے لیے بطور کالم نگار کام کرتے رہے، اس سے پہلے ٹائم میگزین کے لیے بھی کام کیا جب کہ وہ بی بی سی اردو اور بی بی سی پشتو کے نمائندے بھی رہے۔رحیم اللہ یوسفزئی افغانستان اور شمال مغربی پاکستان کے امور کے ماہر سمجھے جاتے تھے۔مرحوم کی صحافتی خدمات کے اعتراف میں حکومت پاکستان نے انہیں 2004 میں تمغہ امتیاز اور 2009 میں ستارہ امتیاز سے نوازا۔

وزیراعلیٰ خیبر پختونخوا محمود خان نے سینئر صحافی اور تجزیہ کار رحیم اللہ یوسفزئی کے انتقال پر اظہار افسوس کرتے ہوئے ان کے اہل خانہ سے تعزیت ہمدردی کی ہے۔ انہوں نے مرحوم کی مغفرت اور پسماندگان کے لئے صبر جمیل کی دعا کی۔

انہوں نے اپنے بیان میں کہا کہ اہلخانہ کے غم میں برابر کے شریک ہیں۔ رحیم اللہ یوسفزئی صحافت کے شعبے میں ادارے کی حیثیت رکھتے تھے، ان کی وفات سے صوبے کی صحافتی میدان میں پیدا ہونے والا خلا پر نہیں ہو سکے گا۔

ان کا کہنا تھا کہ صحافت کے شعبے میں آپ کی گرانقدر خدمات کو عرصہ دراز تک یاد رکھا جائے گا۔ مرحوم ایک منجھے ہوئے صحافی ہونے کے ساتھ ساتھ ایک انتہائی نفیس اور شریف النفس انسان تھے۔

٭۔۔۔۔۔۔۔۔۔۔۔۔
نوٹ: قلب نیوز ڈاٹ کام ۔۔۔۔۔ کا کسی بھی خبر اورآراء سے متفق ہونا ضروری نہیں. اگر آپ بھی قلب نیوز ڈاٹ کام پر اپنا کالم، بلاگ، مضمون یا کوئی خبر شائع کر نا چاہتے ہیں تو ہمارے آفیشیل ای میل qualbnews@gmail.com پر براہ راست ای میل کر سکتے ہیں۔ انتظامیہ قلب نیوز ڈاٹ کام