قلم اورتحریرخداکی نعمت،بہترین استعمال ہمارافرض ہے،رحمان زاد

راولپنڈی . خانہ فرہنگ ایران راولپنڈی میں روزقلم کی مناسب سے میڈیا کے مختلف نمائندوں کے ساتھ ایک دوستانہ نشست رکھی گئی جس میں کثیر تعداد میں میڈیا سے وابستہ افراد نے شرکت کی ،نشست سے خطاب کرتے ہوئے خانہ فرہنگ اسلامی جمہوریہ ایران ،راولپنڈی کے ڈی جی آقای فرامرز رحمان زاد نے کہا کہ ایرانی کیلنڈر کے مطابق روزقلم14 تیر کو منایا جاتا ہے۔اس دن کاتعلق ایران کی قدیم تاریخ سے وابستہ ہے۔

ابو ریحان البیرونی نے اپنی کتاب آثار الباقیہ میں 14 تیر کوروز تیر(عطارد)کا دن کہاہے۔ فارسی ادب و ثقافت میںتیر( عطارد) کا تعلق کاتب اورقلم سے وابستہ افراد سے ہے۔بلاشبہ ایک دن قلم اور تحریر کے نام سے منانے سے اس کی قیمت ادا نہیں ہوتی بہرحال یہ دن ایک علامت ہے۔ماضی میں، لوگ بات چیت اورایک دوسرے سے ارتباط پیدا کرنے کے لیے پتھرپر لکھنے کے ساتھ کندہ کاری کے طریقے استعمال کرتے تھے۔

انہوں نے کہا کہ قرآن پاک میں اللہ تعالی نے قلم کو معجزہ قرار دیتے ہوئے اس کی قسم کھائی ہے۔ہم دیکھتے ہیں کہ ایران کی تاریخ اور اسلام دونوں میں قلم کو کتنی اہمیت دی گئی ہے۔قلم انسان کی دوسری زبان ہے اور انسان جو کچھ سوچتا ہے اسے قلم اور تحریر کے ذریعے دوسروں تک پہنچایا جا سکتا ہے۔

اور اگر یہ طریقہ کار موجود نہ ہوتا تو عظیم مفکرین اپنے آثار اور حالات دوسروں تک کیسے پہنچا سکتے تھے۔سب سے اہم بات تحریر اورقلم کے بارے میں کہی جا سکتی ہے وہ یہ ہے کہ مصنف کو شعور میں اضافہ اورانسان کی رشدو ہدایت کو مطمع نظر رکھنا چاہئے۔

واضح رہے کہ ہر قسم کی تحریر انسان کے رشد و ارتقا کا سبب بنتی ہے اور اس کے برعکس انسان کے زوال کا سبب بھی بن سکتی ہے۔ ہم یہ نتیجہ اخذ کرتے ہیں کہ قلم اور تحریر خدا کی طرف سے ایک نعمت ہے، اس لیے اس کا بہترین طریقے سے استعمال ہمارا فرض ہے۔

انہوں نے میڈیا کے نمائندوں کا شکریہ ادا کیا اوران کی طرف سے کئے گئے سوالات کا جواب دیتے ہوئے کہا کہ پاکستان اورایران کے درمیان بہت ساری مشترکات ہیں اردو زبان میں ستر فیصد فارسی شامل ہے اسی طرح برصغیر میں آٹھ سو سال تک فارسی قومی زبان ر ہی ہے.

انہوں نے دونوں اسلامی ممالک کے عوام اوردیگر شعبوں سے تعلق رکھنے والے افراد کو ایک دوسرے کے قریب لانے اورایک دوسرے کے دینی و ثقافتی مشترکات کو اجاگر کرنے کیلئے مختلف سیمینار ز ،کانفرنس اورتقاریب کے انعقاد کیلئے ہرممکن تعاون کی یقین دہانی کرائی۔
٭۔۔۔۔۔۔۔۔۔۔۔۔
نوٹ: قلب نیوز ڈاٹ کام ۔۔۔۔۔ کا کسی بھی خبر اورآراء سے متفق ہونا ضروری نہیں. اگر آپ بھی قلب نیوز ڈاٹ کام پر اپنا کالم، بلاگ، مضمون یا کوئی خبر شائع کر نا چاہتے ہیں تو ہمارے آفیشیل ای میل qualbnews@gmail.com پر براہ راست ای میل کر سکتے ہیں۔ انتظامیہ قلب نیوز ڈاٹ کام